Կալյեխոնը, որը շատ է ուզում հաղթել Լա լիգան ու ՉԼ-ն, խոսել է իրենց հաջորդ մրցակցի մասին. «Ժամանակից շուտ չենք կենտրոնանում առաջիկա հանդիպումենրի վրա: Այժմ մտածում ենք միայն «Լևանտեի» հետ խաղի մասին, որում պարտավոր ենք հերթական երեք միավորը վաստակել: Մեծ հաճույք է «Բեռնաբեուում» խաղալը, հաճույք է գիտակցել, որ այդքան մարդ դիտում է քո խաղը: Ուզում ենք սեփական հարկի տակ յուրաքանչյուր հանդիպմանը խաղալ այնպես, կարծես դա մեր վերջին խաղն է»:

Իր անհատական խաղամակարդակի մասին Կալյեխոնն ասաց. «Շատ գոհ եմ: Տուն վերադառնալը իսկական երազանք էր ինձ համար, և այն իրականացավ: Ֆանտաստիկ է խաղալ աշխարհի լավագույն ֆուտբոլիստների կողքին: Ուզում են աճել, լավագույն խաղս ցուցադրել և օգնել իմ թիմին: Փորձում եմ օգտվել ինձ ընձեռված յուրաքանչյուր հնարավորությունից: Ջանք չեմ խնայում այս թիմում, ուժերիս ներածին չափով աշխատում եմ»:

Իրենց գլխավոր մարզչի՝ ժոզե Մոուրինյոյի մասին Կալյեխոնը նշեց. «Նա ինձ վստահություն է հաղորդում: Նա պարզ, ուղիղ մարդ է, ինչը լավ է անդրադառնում ֆուտբոլիստների վրա: Մոուրինյոն ուղիղ ասում է այն, ինչ մտածում է: Նա երջանիկ է այստեղ, աշխատելու ու տիտղոսներ նվաճելու մեծ ցանկություն ունի: Կարծում եմ՝ չի հեռանա թիմից, չեմ ուզում, որ գնա: Մոուրինյոն երջանիկ է «Ռեալում»»:

Ֆուտբոլի վիճակագրության ու պատմության միջազգային ֆեդերացիայի կողմից Լա լիգան ճանաչվել է աշխարհի լավագույն ազգային առաջնությունը: Այս մասին Կալյեխոնն ասաց. «Ամեն տարի Լա լիգայի թիմերի միջև մրցակցությունն ավելի է մեծանում: Տարեցտարի ավելի բարդ է դառնում հաղթել բոլոր թիմերին: Վառ օրինակ է անցած տուրի «Խետաֆեի»  դեմ հանդիպումը: Թիմերն ամեն ինչ անում են մեզ հաղթելու համար: Առաջին հորիզոնականում լինելու գաղտնիքը մեծ աշխատանքն ու համբերությունն է: Ինքս հավատում եմ, որ ամեն ինչ տրվում է աշխատանքի շնորհիվ»: