Թիմի գլխավոր մարզիչ Վարդան Բիչախչյանը հայտնեց, որ այս հավաքին, որը կտևի մինչև հունվարի 22-ը, մասնակցում է 24 ֆուտբոլիստ, այդ թվում` թիմի միակ լեգեոներ Լի Լամին Յորոն, ինչպես նաև բոլորովին վերջերս «Շիրակի» հետ պայմանագիր կնքած պաշտպան Հովհաննես Գրիգորյանն ու դարպասապահ Արթուր Հարությունյանը: Մարզումներին մասնակցում է նաև 18-ամյա կիսապաշտպան Դավիթ Հակոբյանը, ով դեկտեմբերի 2-րդ կեսում մեկշաբաթյա փորձաշրջան անցավ Աթենքի «Պանատինաիկոսում»:

Ակումբը հրաժարվել է փորձառու պաշտպան, 28-ամյա Գառնիկ Սարգսյանի ծառայություններից, ով անցած մրցաշրջանում «Շիրակի» կազմում միայն 9 հանդիպման էր մասնակցել:

Բիչախչյանի խոսքերով առաջիկա օրերին թիմում կփորձարկվեն արտասահմանից հրավիրված մի քանի լեգեոներներ: Ըստ գլխավոր մարզչի` «Շիրակը» կենտրոնական պաշտպանի, եզրային կիսապաշտպանի և հարձակվողի կարիք է զգում:                                                                                                                              

Ավելացնենք, որ թիմի 2-րդ ուսումնամարզական հավաքը հունվարի 25-ից կընթանա ֆուտբոլի ակադեմիայում, իսկ 3-րդը` փետրվարի 10-ից Անթալիայում: