Հերթական մարզումից հետո, «Շիրակի» գլխավոր մարզիչ Վարդան Բիչախչյանն ակումբի պաշտոնական կայքի հետ զրույցում խոսեց թիմի ներկայիս վիճակից, ինչպես նաեւ նորեկներից:

- Արդեն 8 օր է, ինչ գտնվում ենք Ավանի ֆուտբոլի ակադեմիայում, որտեղ անցկացնում ենք այս տարվա առաջին ուսումնամարզական հավաքը: Ամեն ինչ ընթանում է բնականոն հունով, այն ինչ նախատեսել էինք իրականացնում ենք: Տղաների նվիրվածությունից գոհ եմ:

- Ինչի՞ն եք ուշադրություն դարձնում այս հավաքի ժամանակ:

- Այս հավաքի ժամանակ հիմնականում ուշադրություն ենք դարձնում տղաների տեխնիկական, տակտիկական որակների վրա եւ բոլոր մեր մարզումները, բացառությմաբ ուժային մարզումները, որոնք անցկացնում ենք մարզասրահում, կազմակերպված են գնդակներով: Այսպիսով փորձում ենք գնդակի հետ վարժությունների շնորհիվ բարելավել եւ ֆիզիկական, եւ 

տեխնիկա-տակտիկական ունակությունները: Դեռեւս մեկ շաբաթ էլ կմարզվենք Ավանում եւ առաջին հավաքի ավարտին, հունվարի 22-ին, ստուգողական հանդիպում կանցկացնենք «Բանանցի» հետ, որից հետո էլ առաջին հավաքը կավարտվի:

- Գո՞հ եք թիմի նորեկներից:

- Նախորդ տարվա վերջում մենք պայմանագիր կնքեցինք դարպասապահ Արթուր Հարությունյանի եւ պաշտպան Հովհաննես Գրիգորյանի հետ:Մենք նրանց երկուսին էլ ճանաչում էինք, նրանք արդեն բավական երկար հանդես են գալիս Հայաստանի բարձրագույն խմբի առաջնությունում: Երկուսից էլ գոհ եմ, նրանք շատ նվիրումով եւ ջանասիրաբար են մարզվում:

- Այսօր առաջին անգամ թիմի հետ մարզվեց «Շիրակում» փորձաշրջան անցնող սենեգալցի կիսապաշտպան Իբրահիմ Կանը: Ի՞նչ կասեք նրա մասին:

- Այսօր առավոտյան էլ էր նա մարզվեց, սակայն երեկոյան մարզումն առաջինն էր, որ նա լիարժեք անցկացրեց թիմի հետ: Հստակ դեռ ոչինչ չեմ կարող ասել նրա որակների մասին: Մինչ ստուգողական հանդիպումը կհետեւենք նրան, իսկ ստուգողական հանդիպմանը նրան խաղային ժամանակ կտրամադրենք, որպեսզի նա կարողանա դրսեւորել ինքն իրեն եւ արդեն դրանից հետո կորոշենք, կմնա նա արդյոք թիմում, թե ոչ: