-Որպես նախաօլիմպիական տարի ինչպե՞ս կգնահատեք 2011 թվականը:

-Որպես նախաօլիմպիական տարի արդյունքներն այնքան էլ հաջող չեն, դեռևս ընդամենը 1 ուղեգիր ենք նվաճել, իսկ 2008-ին 4 ներկայացուցիչ ունեինք օլիմպիադայում: Առջևում մեկ վարկանիշային մրցաշար կա, որտեղ պետք է ամեն ինչ անենք ուղեգրերի թիվն ավելացնելու համար: Ցավոք մրցաշարը կրկին տեղի կունենա Թուրքիայում' Ստամբուլում, ապրիլի 13-ից:

-Ինչո՞ւ ցավոք, պարոն Գաբրիելյան: Թուրքիայում և Ադրբեջանում մեր մարզիկները ճնշվա՞ծ են լինում:

-Փորձը ցույց է տվել, որ որոշակի լարվածություն է լինում նրանց մոտ: Այս տարի Ադրբեջանում էլ, Թուրքիայում էլ մեր բռնցքամարտիկները պարտավոր էին ավելի հաջող հանդես գալ, սակայն, ինչպես տեսաք, արդյունքներն այնքան էլ հաջող չէին:

-Քայլեր ձեռնարկվո՞ւմ են այդ ուղղությամբ, և ինչպե՞ս եք նախապատրաստվում այդ մրցաշարին:

-Այո, աշխատանքներ տարվում են, և վստահեցնում եմ՝ այս անգամ Անկարայում ավելի լավ արդյունքներ կտեսնենք: Չնայած բարդ է լինելու. մրցաշարին մասնակցելու են ուժեղագույնները, բոլորը գալու են օլիմպիական ուղեգրերի հետևից: Ամենաբարդը լինելու է Հրաչիկ Ջավախյանի համար. նրա քաշային կարգում ընդամենը 1 տեղ է մնացել և միայն հաղթողն է ուղեգիր նվաճելու: Մինչև 49 կգ քաշային կարգում 4-5 թափուր ուղեգիր կա և, կարծում եմ, այդ քաշային կարգում անպայման կնվաճենք: Ծանր և գերծանր քաշային կարգերում նույնպես կատաղի պայքար է լինելու, քանի որ երկուական ուղեգիր է մնացել:

Մրցաշարի նախապատրաստական աշխատանքներն արդեն սկսել ենք: Հավաքականի տղաներն այս պահին ուսումնամարզական հավաք են անցկացնում Ծաղկաձորում, 27-ին կվերադառնան, իսկ տոներից հետո կրկին կսկսեն պատրաստվել:

-Ի՞նչ սկզբունքներով եք ընտրում հավաքականի անդամներին:

-Միշտ ընտրում ենք ուժեղագույններին: Մինչև վարկանիշային մրցաշարը 3 այլ մրցաշարեր կան, որոնք մեզ ընտրելու հնարավորություն կտան: Հունվարին Հայաստանի առաջնությունն է լինելու, փետրվարին Սոֆիայում (Բուլղարիա) և Տամպերեում (Ֆինլանդիա) ևս երկու մրցաշար. այդ երեք առաջնություններում իրենց լավագույնս դրսևորածներն էլ կընդգրկվեն հավաքականի կազմում:

-Առավելագույնը քանի՞ ուղեգիր եք ակնկալում:    

-Եթե չորս ուղեգիր ունենանք հրաշալի կլինի, սակայն դա իրատեսական չէ: Երեքը գերազանց արդյունք կլինի այսօրվա մեր հավաքականի համար: Երեքից քիչն արդեն անհաջող կհամարենք: