Բելառուսական ԲԱՏԷ-ի նորեկ Զավեն Բադոյանն իր նախկին ակումբի՝ Դիլիջանի «Իմպուլսի» պաշտոնական կայքին տված հարցազրույցում պատմել է ԲԱՏԷ-ում անցած փորձաշրջանի մասին.

«Փորձարկվում  էի ձախ կիսապաշտպանի դիրքում, որն իմ նախասիրած դիրքն է: Տեղեկացա, որ պիտի փոխարինեմ «Բատեից» Մոսկվայի «Դինամո» տեղափոխված ձախ  եզրային կիսապաշտպան Պավել Նեխայչիկին: Բայց այս հարցում վերջնական որոշում կայացնողը թիմի գլխավոր մարզիչ Վիկտոր Գոնչարենկոն է: Եթե նա նպատակահարմար գտնի, որ պիտի օգտակար լինեմ կենտրոնում, ապա ուժերս կփորձեմ կենտրոնում: Եթե անհրաժեշտ լինի կարող եմ խաղալ նաեւ ենթահարձակվողի դիրքում»,- ասել է նա:

Բադոյանը պատմել է բորիսովյան ակումբի առաջիկա պլանների մասին.

«Թիմը դեկտեմբերի 11-ից արձակուրդում է: Հունվարի 16-17-ին բուժզննում կանցնենք, իսկ հունվարի 20-ից կսկսի նոր մրցաշրջանի նախապատրաստությունը: Նախատեսվում է, որ «Բատեն» 3 ուսումնամարզական հավաք կանցկացնի Թուրքիայում»,- նշել է նա:

Բադոյանը խոսել էր իր նախկին երեք ակումբների մասին.

«Երեք ակումբին էլ՝ «Կիլիիկային», «Գանձասարին» և «Իմպուլսին» շնորհակալ եմ կայացմանս ու վարպետությանս աճին նպաստելու համար: Դեռ 16 տարեկան էի, երբ «Կիլիկիայում» ինձ մարզիչները վստահեցին ու հիմնական կազմում ընդգրկեցին, որն էլ օգնեց սեփական ուժերիս հանդեպ հավատ ձեռք բերելուն: «Կիլիկիայի» կազմում 2 տարի խաղալուց հետո զորակոչվեցի ազգային բանակ, ու այդ ընթացքում հանարավորություն ունեցա մարզական կարիերաս շարունակելու Կապանի «Գանձասարում», ու այս թիմի հետ դարձա ՀՀ առաջնության բրոնզե մեդալակիր: Իսկ ունակություններս ավելի ամբողջական ու լիարժեք դրսեւորելու հնարավորություն ընձեռնվեց «Իմպուլսում»: Շատ շնորհակալ ու երախտապարտ եմ այս առումով, հատկապես «Իմպուլսի» նախագահ Տիգրան Հակոբյանին եւ թիմի գլխավոր մարզիչ Արմեն Գյուլբուդաղյանցին, որոնց պահանջկոտ ու հոգատար վերաբերմունքը մեծապես նպաստեցին նախ ՀՀ ազգային հավաքական հրավիրվելուն, ապա նաեւ «Բատե» տեղափոխվելուն: Նրանց քաջալերանքն ու ոգեւորումը ինձ ուժ տվեցին Բելառուսում էլ լավագույն կողմերս դրսեւորելու եւ «Բատեի» մարզիչների ուշադրությունը գրավելուն: Հիմա Բելառուսում ողջ ջանքերս կփորձեմ գործադրել հայկական ֆուտբոլի եւ «Իմպուլսի» պատիվը բարձր պահելու համար, ու կջանամ ամրապնդվել «Բատեի» հիմնական կազմում, որպեսզի ոչ միայն «Բատեի» կազմում կարողանամ մասնակցել եվրագավաթների հանդիպումներին, այլ տեղ ունենամ նաեւ ՀՀ ազգային հավաքականի հիմնական կազմում»,- եզրափակել է նա: