Հայաստանի հավաքականի ֆուտբոլիստ Զավեն Բադոյանը, ով օրերս պայմանագիր է ստորագրել Բելառուսի չեմպիոն ԲԱՏԷ-ի հետ, հարցազրույց է տվել «Իմպուլսի» պաշտոնական կայքին։

-ԲԱՏԷ-ում ինչպե՞ս ընթացավ փորձաշրջանդ:Մարզումներից բացի մասնակցեցի՞ր արդյոքստուգողական կամ երկկողմանի խաղի:

-Փորձաշրջանի ընթացքում ինտենսիվորեն ներգրավվեցի թիմի մարզումներին: Այդ ընթացքում ինձ բախտ չվիճակվեց ստուգողական հանդիպումների մասնակցել, քանի որ ԲԱՏԷ-ն պատրաստվում էր նախ երկրի առաջնության եզրափակիչ տուրի Բրեստի «Դինամոյի» հետ խաղին, ապա Եվրոպայի չեմպիոնների լիգայի խմբային մրցաշարի «Բարսելոնի» հետ արտագնա մրցամարտին:

-Ի՞նչ դիրքում էիր փորձարկվում: Ո՞ր դիրքում կնախընտրեիր խաղալ:

-Փորձարկվում  էի ձախ կիսապաշտպանի դիրքում, որն իմ նախընտրած դիրքն է: Տեղեկացա, որ պիտի փոխարինեմ ԲԱՏԷ-ից Մոսկվայի «Դինամո» տեղափոխված ձախ  եզրային կիսապաշտպան Պավել Նեխայչիկին: Բայց այս հարցում վերջնական որոշում կայացնողը թիմի գլխավոր մարզիչ Վիկտոր Գոնչարենկոն է: Եթե նա նպատակահարմար գտնի, որ պիտի օգտակար լինեմ կենտրոնում, ապա ուժերս կփորձեմ կենտրոնում: Եթե անհրաժեշտ լինի կարող եմ խաղալ նաեւ ենթահարձակվողի դիրքում:

- Որքանո՞վ հասցրեցիր ծանոթանալ նոր թիմին, ակումբի ենթակառուցվածքին, խաղացողներին,մարզիչներին: Ո՞ւմ հետ հասցրեցիր մտերմանալ:

-Ինձ թիմում շատ ջերմ ընդունեցին, ինչն էլ օգնեց արագ մերվելու կոլեկտիվին: Զգացվում է, որ այստեղ առողջ մթնոլորտ է տիրում, որն էլ մեծապես նպաստում է հաջող ելույթներին: Շփվեցի, իհարկե  թիմի բոլոր խաղացողների հետ: Բայց ավելի շուտ մտերմացա բրազիլացի կիսպաշտպան Ռենան Բրեսանի հետ, ում հետ խաղադաշտում շատ արագ լեզու գտա:

-Ի՞նչ լեզվով էիք հաղորդակցվում: Անգլերենի տիրապետո՞ւմ ես: Շա՞տ են արդյոք լեգիոներները:

- Հաղորդակցվում  էի ռուսերենով, սակայն օտարերկրացի խաղացողների հետ լեզվական խնդիրներ չունենալու համար կաշխատեմ շատ արագ նաեւ անգլերենի տիրապետել, ազատ ժամանակի դեպքում  հատուկ արագացված ուսուցման դասընթացի կմասնակցեմ: Մինչեւ ԲԱՏԷ-ին միանալը թիմում կային 2-ական բրազիլացի եւ սերբ լեգիոներներ: Այժմ ինձ հետ մեկտեղ ԲԱՏԷ-ի կազմը համալրեց նաեւ 19-ամյա մակեդոնացի աջ պաշտպան Բոյան Գերորգիեւսկին, որի հետ գրեթե միաժամանակ պայմանագիր կնքեցինք:

-Ինչո՞վ են իրարից տարբերվում «Իմպուլսի» եւ ԲԱՏԷ-ի խաղաոճերը:

-Այս առումով կարծում եմ խնդիրներ չեմ ունենա, քանի որ «Իմպուլսի» եւ ԲԱՏԷ-ի խաղաոճերը էականորեն չեն տարբերվում իրարից: Երկու թիմերն էլ հիմնականում ձգտում են դիտարժան ու կոբինացիոն ոճով գործել:

- «Բարսելոնի» հետ խաղից առաջ մասնակցեցիր Իսպանիայում անցկացրած ԲԱՏԷ-ի 5-օրյա հավաքին:Որքանո՞վ էր այն օգտակար, ի՞նչ ուսանելի դաս ստացար այնտեղ եւ ինչի՞ն էր, հատկապես ավելի մեծուշադրություն դարձվում այդ հավաքի ընթացքում: Իսպանիայի մարզաբազանների պայմաններնինչպիսի՞ն էին:

- Նախ, Իսպանիայում մարզման հրաշալի պայմաններ էին ստեղծված, հետո էլ այդ կարճատեւ ուսումնամարզական հավաքը ինձ համար շատ օգտակար եղավ այն առումով, որ ես հասցրի ավելի շուտ ընտելանալ ապագա խաղընկերներիս: Այդ հավաքի ընթացքում փորձարկվեցին  նաեւ տակտիկական որոշակի մոդելներ:

-Ի՞նչ տպավորություն ստացար ՉԼ-ի խմբային մրցաշարի՝ դեկտեմբերի 6-ին կայացած«Բարսելոնա»-ԲԱՏԷ մրցամարտից՝ անմիջականորեն ներկա գտնվելով խաղին:

-Իհարկե, իսպանական ֆուտբոլի գրանդ ակումբներից մեկի՝ «Բարսելոնայի» խաղին հանրահայտ «Նոու Կամպ» մարզադաշտում անմիջականորեն ականատես լինելը միշտ էլ ուսանելի մեծ դաս է յուրաքանչյուր ֆուտբոլիստի համար: Հիմա անհամբերությամբ սպասելու եմ եկող տարվա ՉԼ-ի գավաթի խաղարկության վիճակահանությանը, եւ երազում եմ, որպեսզի խմբային մրցաշարում կրկին հանդիպենք ներկայումս աշխարհի լավագույն ակումբային թիմին՝ «Բարսելոնային»: «Բարսելոնա»-ԲԱՏԷ խաղից անջնջելի ու անմոռանալի տպավորություններ ստացա:

-Որքանո՞վ էին քո նոր ակումբում տեղեկացված հայկական ֆուտբոլի մասին, եւ հիշո՞ւմ էին«Իմպուլսի» քո երբեմնի խաղընկեր Հովհաննես Գոհարյանին, որը ժամանակին խաղացել է նաեւԲԱՏԷ-ում:

-Բոլորն էլ այստեղ մեծ հարգանքով էին հիշում ԲԱՏԷ-ում ժամանակին հանդես եկած «Իմպուլսի» իմ նախկին թիմակից Հովհաննես Գոհարյանին: Իսկ ՀՀ ազգային հավաքականի վերաբերյալ բավականին տեղեկացված էին, եւ մեծ ափսոսանքով էին խոսում, հատկապես Իռլանդիայի ընտրանու հետ ընտրական մրցաշարի ավարտական տուրում գրանցված արդյունքի մասին:

-Ինչպիսի՞ն են ԲԱՏԷ-ի առաջիկա ծրագրերը:

-Թիմը դեկտեմբերի 11-ից արձակուրդում է: Հունվարի 16-17-ին բուժզննում կանցնենք, իսկ հունվարի 20-ից կսկսի նոր մրցաշրջանի նախապատրաստությունը: Նախատեսվում է, որ ԲԱՏԷ-ն 3 ուսումնամարզական հավաք կանցկացնի Թուրքիայում:

Լուսանկարը՝ ԲԱՏԷ–ի պաշտոնական կայքի